Finca Amapola - Agrotourismus Hotel

Die Finca Amapola isch echt en Draum. Scho wenn de neikommsch, moinsch du bisch em Paradies, so viele Palma ond andre Pflanza. Ond wenn des große Eisetür aufgoht, wirsch scho von de Chefs persönlich empfanga. Da fühlsch di glei wie dahoim. Also wer bei denne zwoi, also bei dr Nicole ond beim Jörg, sich dr Tapas- und dr Grillobend entgeha lässt, dem kann ma nemme helfa !!!

Also mir henn des Lavanda-Zimmer ghabt. I kann bloß saga, alles top. A riesa Bett mit spitzamäßige Matratza, quasi a begehbare Dusche, so groß war die, a jenseits großes Waschbecka, dass sogar mei Frau alle ihre Sacha hat nastella kenna, ond a separates WC. Urlaubsherz, was willsch mehr ? Doch, vielleicht oins noch: Nicole ond Jörg, danke für des problemlose Einchecka direkt bei Euch, ond nochmol sakrisch danke, dass mir des Zimmer am Abreisetag dr ganze Tag noch umsonscht han nütza dürfa. Des war echt oin Urlaubstag mehr.

Also Leit echt, des Frühstück kann ma oifach net besser mache. Es gibt echt älles, was de willsch, ond des jeden Tag frisch. Der wo jetzt au no was zom Meckra hat, der sollt echt besser mol zom Arzt ganga oder oifach dahoim bleiba. Ach so no was zom Grillabend: Jörg echt, deine Rompsteaks waret de beschte, die in meim ganza Leba gessa hau. Des macht Dir so schnell koiner nach. Und Eure Tapas: i hab echt Pech ghabt, dass i bloß oin Mage mit auf Eure Insel bracht hab. I hätt echt bis zom Umfalle spachtle kenne, so lecker waret die.

Also des Tolle isch, dass de vor lauter Annehmlichkeita dr Service gar net merksch. Jeden Tag leget se dir deine frische Strandtücher aufs Sofa, die Bette werdet alle zwoi Tag frisch überzoga, jeden Tag kriegsch frische Handtücher uffs Zimmer, ond die Reinigung isch echt tiptop. Ach so, ond beim Frühstück springet de Angestellte wie die Hase, du musch di echt om nix kümmre. Ach so was i noch sage wollt: Jörg, danke für dei koschtelose Golfstund.

Also die Finca liegt glei bei dr Hauptstroß, von wo ma glei in Campos oder aber au glei an dr Küschte isch, aber trotzdem älleweil so von de Pflanza eibettet, dass ma moint, ma isch ganz ganz weit weg. Ond vom Flughafa isch es bloß knapp a halba Stund.

Beliebte Aktivitäten

• Strand

Also der Pool sucht echt seinesgleichen. Immer hasch a schattigs Plätzle krieagt, weil oifach jeder genug Platz ghabt hat, weil halt genug Liege ond Schirm da sind. Ond de Liege selber: so woich, echt ein Traum. Da hosch dr ganze Tag nastracka kenna, ohne dass dir des Kreiz am Abend weh doa hat.